WAYANG KULIT

Lakon : Banowati Wuyung

Gagrag : Sak Senenge Dewe
Dalang : Ki Waton Muni

Naliko negoro Ngastino katekan mungsuh, sekabehe bolo kurowo kinunjoro karo mungsung mau. Duryudono, Sengkuni, Dursosono lan liyo-liyane. Nanging prameswari Ngastino Banowati lan anake Dursilowati iso mlayu ono ing jroning alas. Kuwi mau kahanan negoro Ngastino kang katekan mungsuh.

Ing liyo laladan Janoko nompo nawolo soko negoro Wirotho, isine nawolo menowo negoro Wirotho prabu Matswopati njaluk tulung Janoko amargo arep ketekan mungsuh soko negoro Jurangjero kang arep ngambak’ake jajahane.

Naliko arep menyang negoro Matswopati, ing tengah alas dumadakan Janoko sak Punokawane kepethuk Banowati lan anake Dursilowati.

Banowati :

“Dimas Janoko, Ngastino ketekan mungsuh Di...aku njaluk tulung kangmas Duryudono lan liyo-liyane luarono soko pakunjaran yooo...Di..”.

Dursilowati :

“Inggih paman, mesakaken kang Romo Duryudono sak meniko kinunjoro mengsah...”

Janoko :

“Iyo kakang mbok, sak iki ugo tak prapto menyang Ngastino...”.

Banowati :

“Sik to Di...ora sah kesusu, kene cedak karo kakang mbok kene...., Anakku Dursilowati..., njajal kowe golek panganan neng warung kono nduk...ngge sarapan pamanmu Arjuno iki...”

Dursilowati :

“Ngestok’aken dhawuh...ibu..”.

Banowati :

“Dimas Janoko...., wis pirang-pirang sasi aku ra pethuk sliramu dimas, atiku iki prasasat kairis karo landepe pring apus..., koyo ngene iki rasane wong lorobronto menyang sliramu dimas Janoko..”.

Janoko :

“Aku yo semono ugo kakang mbok....nanging kepiye maneh, jejibahan soko kangmas Puntodewo kang kudu dak rampungake disik....”.

Banowati :

“Dimas Arjuno....saiki enenge muk kowe karo aku...kakang mbok kok pingin senden neng dadamu dimas Arjuno..”.

Petruk :

“Gong....nek eruh ngono kuwi piye perasaanmu lee..”.

Bagong :

“Hehehehe.....eruh ngono kuwi marai kelingan Maryatun ae..kang...”.

Petruk :

“Maryatun kuwi sopo Gong.....”.

Bagong :

“Maryatun kuwi calon ipemu tapi ra sido kang...”.

Petruk :

“Oooalah ngono to...”.

Banowati :

“Petruk lan Bangong...cubo kowe mbok nyusul ponakanmu Dursilowati... nyoo tak wehi duit tukuo rokok ngge kowe sak kloron....”.

Petruk :

“Halah....padine arep yhang...yhangan ae kok...ndadak golek alasan...”.

Bagong :

“Wis podo gedene kang Petruk.... kowe ra sah melu cawe-cawe... dikongkon budal yo budal.... jenenge batur ki yoo ngene iki...kon rono yo rono...kon rene yo rene...ngono loo...”.

Petruk :

“Nggih menawi ngoten...pundi duite tak budal tumbas rokok...”.

Banowati :

“Dimas Janoko....mumpung iki muk kowe karo aku...tak ambali maneh, wis pirang-pirang sasi aku ra pethuk sliramu dimas, atiku iki prasasat kairis landepe pring apus..., kepingin cumedak karo kowe dimas....koyo ngene iki rasane wong nandang lorobronto, amung Dimas Janoko kang katon ing netrane kakang mbok iki....tobat...tobat..tobat...tobat...”.

Janoko :

“Kakang mbok....sejatine semono ugo rasane tyas ingsun...sak kedepan ketok melo-melo eseme kakang mbok...sak kedepan ketok melo-melo pasuryane kakang mbok...”.

Banowati :

“Semono ugo aku - dimas Janoko.... kroso bombong atiku menowo cedak dimas Arjuno... roso nandang bronto iki seneng kang ora kiniro, ananging yo gelo... Gelo amargo ra biso reraketan....kapang kang mlumpuk ing jroning atiku prasasat wis sak gunung gedene, prasasat ombak samudro kang nerak pinggire watu karang....gumebyur, jumlegur suarane.... ”.

Janoko :

“Iyooooo kakang mbok... katresnanku kuwi yo semono ugo tan ono watese... endah sumunare suryo ing wayah esuk... lan endah angslupe suryo ing wayah sore... isih kalah  karo endahe pasuryanmu kakang mbok.. ”.

Banowati :

“Dimas Arjuno...aku kok pingin mbok rangkul pundakku, pingin mbok aras pipiku...lan pingin mbok geget lambeku...kelingan patang taun kang kapungkur naliko awake dewe pethuk ing sak pinggire taman keputren Ngastino, naliko aku nunggu dimas Arjuno ”.

Naliko Janoko arep ngrangkul lan ngaras Banowati....dumadakan Dursilowati, Petruk lan Bagong wis teko.  Janoko lan Banowati dadine salah tingkah, arep kukur-kukur sirah ora gatel, pungkasane  Janoko karo Banowati muk esem-eseman lan pandeng-pandengan.

Tancep Kayon